جمعتني وصديقي مناقشة حوارية في قضية تخص الزوجة التانية, وكان على المبدأ متحفظ, رافض الفكرة ومتحفز, أشعرني بالمرارة وأن نفسي أمارة, وإني في الأساس عديم الإحساس, وظن أنه جبل راسخ, وأنا ريح عاصف, لعيلتي وحياتي ناسف, عزمت على مناقشته للتعرف بفكرته والاستنارة بنظرته لأن الزوجة التانية قضية اجتماعية قبل ما تكون حالة شخصية, والحل ليها واجب ومعرفة رأي الحبايب, ونسمع كلام صديقين آرائهم مختلفين.
قلت لصديقي نتكلم ببساطة ونبعد عن السلاطة, ونناقش القضية بعيد عن السطحية, ونتحاور بحرية من غير ديكتاتورية, ونطلق لخيالنا العنان, ونفكر بدون جنان- انتفخت أوداجه, واحمرت عيناه, وعبس وجهه, وخط حاجباه, ونظر لي شذرا, وكأنني جرذا. تغاضيت عن غضبته, وشرعت في طرح فكرتي.
يا صديقى هب ابنك المحروس فشل في الدروس, وكان حلمه يدخل كلية كلاس, حدفه مجموعه على معهد خاص, فكر وعرف خطأه, وحب يصلح غلطه, نشجعه ونساعده ولا نقف ضده, يذاكر تاني ويعيد ولا نقفل له الطريق, ويصيبه يأس وبرود, ويضيع أمله المفقود؟
صديقي ثار غضبان.. انت ليه جبار, تخلط الأمور, والجد والهزار, دول قضيتين في الأصل مختلفين, إيه جاب الزوجة التانية لطالب وكلية قمة!؟
ياصديقى نفس القضية, حاول تشوفها بنظرة تانية, زوجتي بعد العشرة طلعت مش طموحي, قضيت مشوار طويل أحاول تكييف ظروفي، ضاعت منى آمالي, أحلامي, وعقلي شت - والمياه سابت من كفوفي، أستمر معاها وتضيع مني حياتي؟ ومشاكل العالم تبقى فوق دماغي ولا أبعد وأعيش الدنيا وأختارلحياتي واحدة تانية ألاقي معاها نفسي وذاتي؟
قال لي اسكت اوعى تكمل, كلامك مستفز, غير معمر, فين العشرة والمسئولية, الرجولة والإنسانية؟ إزاى تبيع وتهدم بيت, وتهدر حياة وتشرد ولاد, كل دا علشان طموح آمال وأوهام أحلام؟ انت فاكر البيت دا إيه, تهد ركن, تخرب أساس, دا انت حتى تبقى راجل البعيد ما فيش إحساس.
ياصديقى اسمع كلامي, وبالمنطق رد اتهامي, لو تقرير الموظف ضعيف, عمله قليل, وفكره ضئيل, إهماله زايد, ومجهوده عليل, ومنه الزملة شاكيين, والبعد عنه منى العين, ورغم النصح والإرشاد مستمر في العناد, لما نقول عليه ضعيف يبقى الاتهام لمين.. للموظف ولا الرئيس؟
رد صاحبي بسرعة الكلام وقال لي تاني تقول أمثال, دي وظيفة مش جوازة, فرق شاسع في الحالتين.
ياصديقي, الزواج في الأساس وظيفة بس يملأها الإحساس, مشاعر دافية وتربة خصبة, أمومة طاغية, وأبوة واضحة, للكل حق وواجب, وطريق مرسوم وهدف معلوم, وأي خروج عن المسار فشل يستحق الاعتذار, والمسامحة أمر واجب بعد التماس الأعذار, والمصيبة ياصديقى الاستمرار والتكرار, واللي أهمل وساق فيها وما حاولش يصلح الأضرار ما يلومش إلا نفسه وينسى طلب الغفران.
ياصديقى مشكلتنا إننا نغطي خيبتنا, ونقول نعيش نربي عيال, ونكبر البيت الصغنن, نتغاضى عن إهمال متعمد, وعقل متخلف مهيمن, وزوجة في البيت راكنة, ومشاعر وأحاسيس بايتة , تقول جوزي ملكته ومع القايمة حفظته, ما حاولتش تصلح حالها وتطور حياتها ومستقبلها, وتعيش تشارك الحياة وتساند وتقوى في الشدائد, تكبر مشاكلها وتصير جبال, ولما الزوج يتغير, وزوجة تانية تظهر جميلة المنظر, الحياة حواليه تتكهرب, والأولى تعمل مظلومة, والحياة في عنيها سودا, طيب لية ما أصلحتش, وكم المشاكل ما حلتش, بس وقت الجد تعمل ضحية, وتقول ظالم جبار, ما صانش العشرة غدار.
ياصديقي, زوجة تانية طموح إنسان أراد الحياة, حلق بأحلامه وحب اللي يشارك هواه. ونصيحة لكل صبية خايفة من زوجة تانية.. في إيدك حل القضية, عقل وقلب كبير وحنية, شمعة ووردة, ووقت رومانسية, ومشاركة للزوج وجدانية, وعشرة عمر وذكرى جميلة, وحلم كبير سوا تحلموه يجمعكم, تكسبي قلبه ويوهب لك روحه هدية.