جسمها الملفوف
تحتار فيه الوصوف
اتلخبطت فيه الحروف
هتكلم عنك النهارده
خلاص مفيش كسوف
ما انتي عودك مكشوف
يشوفه الوف
وعشيقك عليه ملهوف
لازم أعترفلك
إني في حبك.. خروف
انت أصلا كئيبة
ما ورتنيش من المقطم غير الدويقة
وعامله نفسك بريئة
انت أصل كل حريقة
في كل مصيبة
كنتِ أصيلة
كنتِ جنبي
تزودي مصيبتي وهمي
وزي كل البنات بتحبي أغلى الحاجات
بتحبي زيهم الماس
بس مش أي ماس
بتحبي الماس اللي يكهرب الناس
وبتحرقه من غير إحساس
عشان الشوك اللي في الورد
بحب الورد
وانتِ شوك من غير ورد
وأذيتك مالهاش حد
ولا ليها رد
أذيتك مش ليا لوحدي
دي لكل اللي قاعد عندي
ريحتك آه من ريحتك
مشمتهاش؟ يا بختك
أسوء من التوم
اللي مشمهاش مرحوم
بحسد كل مزكوم
.....
سكوت
انتِ زي العنكبوت
بتشديني ليكي بخيوط
وبعد ما نسهر مع بعض
بموت
خليتي بيتي زي بيتك أوهن البيوت
ليه بحبك؟
مين قال إني بحبك
أو إني حبيتك
أنا كنت زهقان قلت أتعرف على أي واحدة
أي واحدة والسلام
لقيتك وسط شلة فاسدة
مسئلتش إيه وداكي هناك
لو كنت طاهرة وبنت أطهار
ليه بشوفك في صالات القمار؟
وفي بيت الخمار؟
صرفت عليكي فلوسي
الجنية و الدولار
والجزا الدمار
أنا كنت حمار
قلت أهي ليلة وتعدي
كنت مخنوق منك الأول
بس قلت اتحمل
مش عارف أخد نفس
النفس اتحبس
و كأني عبد في قفص
ومن شفايفه اتقرص
أذكر قبلاتك الكبرى تؤلمني
كأني أقبل الكوبرى
تؤلمني شفتي فأقبلك الأخرى
تصيبني قبلتك بالسعال
فابادر بالمضمضة والاغتسال
تقتربين بأنفاسك الحارة من شفتي
ورائحتك تزكم أنفي
وأنف من بجواري
فأقضي معكِ بعض وقتي
ثم أقذفك تحت قدمي
ساحقا إياكي بحذائي
كل يوم شاريكي
بعت نصيبي لشريكي
انتِ ناري وحريقي
جسمك النار صديقي
بكرهك وانتِ بعيدة عني
وأكرهك أكتر وانتِ بين شفايفي
انتِ موتي وحتفي
ولفتك البيضة كفني
أيوة كنت بستعر منك
بستعر من اسمك وبخبي حاجتك وعلبك
بستعر منك قدام أبويا وإخواتي
وبخبي علبتك جوا حاجاتي
إيه لزمتك ليا وليه بتحمل تُقلك عليا
فاكرة نفسك كرافته بتخنق بس بتجيب الاحترام!؟
متزوديش في الكلام
ده انتِ مشنقة وحكم بالإعدام
..............
"عن السجائر نتحدث"