عزيزتى هيفا

آخر تحديث: الخميس 7 مايو 2009 - 10:40 ص بتوقيت القاهرة

 إلى العزيزة هيفا.. تحية طيبة وبعد.. تابعت أنا وغيرى من أبناء هذا الوطن أنباء زواجك الميمون ودخولك بيت العدل.. (أو قصر العدل بقى فالمقامات لازم تبقى محفوظة برضه)..

ولا تتخيلى يا أختاه كم كانت سعادتنا، ونحن نتابع هذا الخبر السعيد.. فعلا كنا سعداء.. دى سنة من أجمل السنين اللى مرت علينا.. مش بس سعادة دى سعادة مختلطة بالفخر لأننا قدرنا نحصل على واحدة من أعضاء مثلث الرعب الشهير (هيفا، إليسا، نانسى، وشركاؤهن) ونضمها لمنتخب جحافل الستات والبنات المصريات خاصة إننا بقالنا سنين بنحاول نوفر بديل محلى ليكى ولأخواتك الفاضلات ومش عارفين..

(روبى كانت عاملة اللى عليها والله لكن ما يقدر على القدرة غير ربنا ويكفيها على الأقل شرف المحاولة).. ده إحنا حتى بدأنا نطبق نظرية وحيد حامد فى عمارة يعقوبيان «كل واحد حر فى هدومه ياختى» وعشان كده بنرحب بيكى وبأذرع مفتوحة وقلوب صافية وبلا أى ضغائن من بتاعة زمان..

لكن دلوقتى وبما إنك بقيتى مننا وعلينا وقريب جدا هتيجى تستقرى فى مصر وستتكحل بك عين الوطن (حلوة مش كده) فخلينى أقولك حاجة بسيطة شايلاها فى قلبى أنا وقلة قليلة من المصريين.. إيه موضوع الـ 9 مليون دولار ده؟..

أصل أنا عايزة أفهمك حاجة مهمة.. موضوع الملايين ده مش ماشى هنا قوى يعنى ده حتى الأستاذ «طارق علام» لما كان بينزل زمان الشارع ويسأل الناس المليون ده فيه كام صفر وحياتك إنتى ما كانوا بيعرفوا.. طب أقولك حاجة تضحك والله ولا ليكى عليا حلفان من كام سنة بس مصر كلها كانت بتدور على صورة جادون تحت كل غطيان الحاجة الساقعة عشان يكملوا بيها صورة عجلة ويكسبوها..

جادون يا هايفا..حلمنا القومى كان جادون.. تقوليلى إنتى 9 مليون؟.. مش هاقولك يا أختى إن مافيش حد فى مصر عنده ملايين.. لأ يا حبيبتى موجودين.. بس السيستم هنا إن الناس اللى عندهم ملايين مابيتكلموش كتير فى المواضيع دى قدام الناس التانيين اللى زينا عشان عنينا وحشة وحسادين وعندنا بقية أحقاد طبقية قديمة مش عارفين نتخلص منها..

وبرضه عشان الأمر ما يسلمش من إن واحد من الناس المغرضين اللى زينا اللى عينيهم تندب فيها رصاصة تطق فى دماغه ويلف حوالين نفسه حزام ناسف ويفجر نفسه فيهم والا حاجة.. يعنى واحد من الـ4 مليون مصرى اللى تحت خط الفقر اللى ممكن يعدى عمرهم كله ما يشوفوش فيه حتة لحمة غير فى المتحف (يجييبوا كام كيلو لحمة الـ9 مليون دولار دول يا هايفا؟)..

أو واحدة من الـ9 مليون بنت اللى مش عارفين يتجوزوا عشان مش لاقيين تمن الجهاز (يجهزوا كام بنت الـ9 مليون دولار دول يا حبيبتى؟)..أو دكتور محترم من اللى قضى فى التعليم 18ــ 20 سنة واتخرج بتفوق عشان يلاقى نفسه متعين بمرتب 600 جنيه (ألا هم الـ9 مليون دولار دول يطلعوا كام 600 جنيه يا روحى؟).. أو الملايين اللى قاعدين على القهاوى من غير شغل..

أو الملايين اللى مش عارفين يشربوا كوباية ماية نضيفة.. أو الملايين اللى مابيعرفوش يجيبوا رغيف عيش من أى فرن.. أو الملايين اللى عندهم سرطانات وفيروس سى وفشل كلوى وبيموتوا عشان مش لاقيين تمن العلاج.. وغيرهم وغيرهم.. هى دى الملايين اللى احنا نعرفها يا قلبى لكن الـ9 مليون دولار دول وحياتك إنتى ما نعرفهم.. ولا عايزين.. مش هنمنعكم تصرفوا فلوسكم والله ولا يفرق معانا تصرفوها فين.. إنتو بس ماتبقوش تقولولنا عشان إحنا أعصابنا خفيفة حبتين.. إحنا هنودى وشنا الناحية التانية وانتى إصرفى اللى تصرفيه..

إصرفى 9 مليون.. 10مليون 11 (سورى ما باعرفش أعد أكتر من كده)، لكن نصيحة من أختك الصغيرة.. بلاش يعنى موضوع الكلام فى الملايين فى الجرايد والمجلات دى.. ماتفسروش فى وشنا.. خلينا عايشين وساكتين..9 مليون دولار فى ليلة؟.. و150 طيارة خاصة تنقل المدعوين.. دول كان ممكن يحرروا فلسطين.. هيفا يا روح قلبى.. دارى على شمعتك تولع.. بدل مانولع إحنا يا حبيبتى ربنا يخليكى ويهدى سرك ياااارب.. والسلام ختام.. إمضاء واحدة مش مضايقة ولا واخدة على خاطرها ولا مفروسة خاااالصصصص.