القرش الأبيض.. ينفع فى البحر الأحمر

آخر تحديث: الخميس 16 ديسمبر 2010 - 10:57 ص بتوقيت القاهرة

 الأسبوع الماضى وصلتنى رسالتين على بريد القراء (اللى هو الفيس بوك يعنى) بيعترض فيها اتنين من المواطنين الشرفاء على النبرة السوداوية الكئيبة اللى بتلون معظم كتابات كتاب الأعمدة اليومين دول،

وبدلا من الرد عليهم بردود بديهية ومنطقية زى: «وهنجيب منين يعنى؟» و«اللى ما يشوف من الغربال..» و«يا بخت من بكانى وبكى عليا..» أو إعطائهم ردود مسكنة زى: حاضرها حول شكواكم للأستاذ منصور وهو إن شاء الله هيشوف حلها إيه (منصور ده اللى هو هيبقى سكرتيرى لما هابقى وزيرة شئون إجتماعية كمان 350 سنة) وبما إنى من البقية الديمقراطية اللى فاضلة فى هذا البلد قررت أتبنى وجهة نظرهم ونديها تفاؤل المرة دى..

صحيح، الواحد لو دور بتفحص شوية فى مجريات حياتنا هيلاقى أشياء كثيرة تدعو للتفاؤل، أولا إحنا عايشين فى دولة بتتسرق بقالها 7000 سنة (إلا 30 طبعا) ولسه لحد النهاردة مافلستش، ثانيا عندنا نيل بيروينا، صحيح احتمال قريب يتحجز عليه بس برضه لحد اللحظة دى بتاعنا، ثالثا عندنا الطقس المعتدل طوال العام ده اللى دايما بيقولولنا عليه، رابعا عندنا حكومة بتخاف علينا وبتقوم على مرعشرات السنين بمجهودات عظيمة بأسلوب ممنهج من أجل الإهتمام بحالتنا النفسية والعقلية وذلك باستخدام طريقة «بص العصفورة» الشهيرة

حروب كروية مع الجزائر بأه، فتاوى دينية مثيرة للجدل، قضايا قتل، حجاب فنانات، ما أنت عايش معانا وعارف، صحيح مش هم اللى بيبدأوا، بس الريموت فى إيديهم، يعلو الصوت، يكتموه دى حاجة ترجعلهم، يا أخى دى حكومة مسخرالك المملكة الحيوانية كلها عشان خاطر عيونك وانت برضه ولا انت هنا. تقلق من مصاريف المدارس يركزولك على إنفلونزا الطيور، تشتكى من تمن اللحمة يقيموا حملة قومية للقضاء على الخنازير، تشتكى من نتيجة انتخابات يطلعلك موضوع القرش الأبيض، صحيح ده شىء من عند ربنا، لكن مافيش مانع برضه من التركيز عليه وتتابع الأخبار عن شن الحملات الحربية لمطاردته حتى أصبحت كل وسائل الإعلام الأجنبية لاهم لها ــ عند الحديث عن مصر ــ إلا موضوع القرش الأبيض ده، وأهو القرش الأبيض ينفع فى اليوم الإسود وفى البحر الأحمر كمان، مش كله عشان مصلحتك؟

مش لو ما كانوش ركزوا ع القرش كانوا البعدا دول بصوا على الإنتخابات وكانت فضيحتك ــ كمواطن فى دولة بتدعى إنها ديمقراطية ــ بقت بجلاجل؟ تفتكر ده مش غرضه تقليل أثر الفضيحة الدولية على نفساوياتك الداخلية؟ حتى السمك فى البحر يا مؤمن عشان راحتك جندوه وانت وبرضه متشائم؟ ده انت بأه اللى غاوى نكد
.
بيقولوا زمان كان فيه راجل يهودى عايش فى منزل من حجرة واحدة مع مراته وأولاده الخمسة، فى يوم فاض بيه وراح للحاخام بتاعه وقاله: خلاص أنا مابقتش عارف أتنفس فى بيتى ليه الدنيا مقفلة فى وشى كده، الحاخام بتاعه قاله: وانت خارج من هنا اشترى خنزير وخده معاك البيت، قاله: يا سيدنا أنا جاى أشتكيلك، تقوللى اشترى خنزير؟ الحاخام قاله: إسمع الكلام وتعالالى كمان أسبوع. الراجل الغلبان فعلا اشترى الخنزير وعاش معاهم فى البيت وكان أسبوع أسود بطبيعة الحال، رجع تانى للحاخام وقاله: أنا خلاص قررت إنى أنتحر إنت ليه عملت فيا كده ، الحاخام قاله: روح بأه إدبح الخنزير وادعيلى، دبح الراجل الخنزير بعد أسبوع من الضغط العصبى المستمر فنام يومها مرتاح وهو بيقول لنفسه : صحيح بقية مشكلاتى ما اتحلتش ،بس على الأقل دبحت الخنزير
.
عزيزى المواطن المصرى الشريف من فضلك تفاءل، مصاريف عيال إيه؟ وأكل مسرطن فين؟ حرية سياسية لمين؟ وتعليم مطور بتاع إيه؟ بطالة وتأخر جواز وفساد ومش عارف إيه، بلاش يا إبنى تنكد على روحك ، الأحسن إنك تدور على أسباب تدعو للتفاؤل، مش انت متضايق دلوقتى؟ أصبر بس أدينا كلنا مستنيين لحظة إلقاء القبض على القرش المختل عقليا المتسبب فى إيذاء السياحة والسياح ويوم ما هيلقوا القبض عليه ويصدروا الحكم بإعدامه ويقيموا كالعادة مهرجان عظيم فى كل وسائل الإعلام، كلنا يومها هننام مرتاحين البال فى ليلة هنشعر فيها بالسعادة بعد ليالى حزينة كتيرة قوى ولسان حالنا هيقول: على الأقل قتلنا القرش.. بص العصفورة