دليل المنتحر الذكى

آخر تحديث: الأحد 21 فبراير 2010 - 9:51 ص بتوقيت القاهرة

حدث منذ عدة أيام أن قام أحد المواطنين بإلقاء نفسه تحت عجلات مترو الأنفاق بغرض الانتحار..

لسنا هنا بصدد مناقشة حالة المنتحر النفسية فبالتأكيد كان مصابا بحالة عصبية ونفسيته كانت زى الطين.. ولن نناقش أيضا السبب، الذى دفعه لارتكاب تلك الفعلة فإما أنه شغل نفسه بالتفكير فى موضوع تافه زى إنه عاطل بقاله 15 سنة أو ركز قوى مع شىء هايف كفشله فى ضمان حياة كريمة لأسرته أو قهر نفسيته عشان عجز عن علاج أحد أبنائه على نفقة الدولة رغم تأكده أن العلاج على نفقة الدولة مخصص لمداواة عيون أعضاء مجلس الشعب والسيد وزير وزارة المالية حفظ الله لنا عينيه، لن نناقش كل تلك الأشياء بل سنناقش تعليق السيد المسئول الذى أدلى بتصريح ثورى يحسده عليه المسئولون الثوريون فى جميع أنحاء المجموعة الشمسية الغراء..

قال السيد المهندس رئيس إدارة مترو الأنفاق تعليقا على انتحار المواطن المذكور: «وينتحروا فى المترو ليه؟.. ما عندهم النيل والبرج»..

وقبل ما تتشنج وتتناول تصريح السيد المسئول بمزيج من الامتعاض والاستنكار حاول تستكشف ما وراء الكلام هتلاقى نفسك عايز تشكره ويمكن تبعتله باقة ورد ودبدوبين.. عندك فكرة إن سنة 2008 وقعت 54 ألف محاولة انتحار فى مصر؟ طب تعرف إن اللى قام بال 54 ألف حالة دول 15 ألف مواطن.. طب تصدق إن اللى توفى منهم 4000 شخص بس..

طبعا سيادتك هتمر عليك الأرقام دى مرور الكرام لكن السيد المسئول وبقية السادة المسئولين نظروا إليها وهالتهم نسبة الفشل الكبيرة لفئة كبيرة من المواطنين واعتبروه عارا أن نفشل فى مجال من مجالات الحياة والموت.. مش بس كده.. دول وجدوا إن الفئة دى فئة غير مستغلة ويمكن بقليل من الجهد أن يكونوا أملا جديدا لرفعة شأن الوطن وضمان حياة كريمة لبقية أبنائه.

ومن هنا قرر السادة المسئولون بدء حملة للقضاء على الجهل الانتحارى فى البلاد والاستفادة من مجهود السادة المنتحرين، وقاموا بإصدار نشرة دورية جديدة تحت اسم: «دليل المنتحر الذكى» وتشمل النشرة 4 فصول:

1 ــ الفاعلية والنجاح.. ومن وحى هذا الفصل كان تفضيل السيد المسئول عن المترو للانتحار فى النيل والبرج على الانتحار أمام المترو. المترو ممكن فى لحظة يقف والسواق عنده فرامل.. هتضيع نفسك وتعيش لكن فى النيل أو فى البرج.. سمى ونط وشوف مين هيلحقك وبكده نضمن إن نسبة النجاح 100% إن شاء الله،

2 ــ النظام والدقة.. من حقك تموت نفسك.. ده حقك اللى بيكفله ليك القانون.. لكن ذنبها إيه البلد تتعطل عشان خاطر رغبة سيادتك فى الراحة الأبدية؟.. هترمى نفسك قدام المترو هتعطله وتعطيل المترو سيتسبب فى تأخير عجلة التنمية ويمكن العجلة تتخرم ولاّ حاجة وإحنا مأجرينها من عجلاتى رخم واخد مننا تأمين كبير.. هتنفعنا إنت ساعتها بقى؟..

3 ــ النظافة من الإيمان.. ارمى نفسك فى النيل دى ماية جارية والنهر هينضف نفسه بنفسه ارمى نفسك من فوق البرج، ويمكن تطير وتبقى ريحت وارتحت لكن فى المترو مين اللى هينزل يلم حضرتك؟.. ده حتى منظر غير حضارى.. حافظوا على نظافة مدينتكم ومثواكم الأخير
4 ــ إيد على إيد.. فيد واستفيد.. من خلال هذا الفصل نناشد فيك حبك للوطن ونرجو منك أن تكون جزءا من الشراكة بين حزب المنتحرين ووزارة السياحة.. عندنا 54 ألف حالة انتحار كل سنة شوف لما واحد ينتحر جنب الهرم، والتانى ينتحر جنب النيل والتالت فى البرج والجرايد تصور ووسائل الأنباء الأجنبية تذيع.. آدى 54 ألف إعلان مجانى ووسيلة مهمة من وسائل الدعاية السياحية للبلد.. وهكذا تبقى أديت واجبك نحو الوطن حيا وميتا..

وهذا أعزائى القراء هو الهدف الخفى وراء كلام السيد المهندس المسئول.. مش عشانة ولا عشان المترو.. لأ.. عشان مصر.. عزيزى المنتحر لا تجعل حبك لنفسك ينسيك حبك للوطن.. السادة المسئولين يتمنون لك انتحارا آمنا وناجحا.. ويدعون من أعماق قلوبهم.. عقبال الباقى.