أشاد الفنان بيومي فؤاد، بالفنان أحمد حلمي، قائلًا: «جملة الذكاء يمشي على قدمين تصف حلمي، وخلال مشاركتي معه في فيلم لف ودوران وجدته يذاكر في الشخصية التي يؤديها بصحبة المؤلف، والمخرج، والمنتج في مقر شركة الإنتاج».
وقال «فؤاد»، في لقاء ببرنامج «90 دقيقة»، المذاع على فضائية «المحور»، مساء الثلاثاء، إن الفنانة دنيا سمير غانم هي النجمة الوحيدة في مصر التي لا تنطبق عليها جملة «ابن الوز عوام»، مضيفًا: «ربنا كرمنا بيها؛ لأنها بتعمل كل الأدوار بنفس الجودة، وبتضيف لأي دور تؤديه».
وكشف عن تلقيه اتصالًا هاتفيًا من الفنان عادل إمام، قائلًا: «قال لي انت شايف نفسك، وواخد كل الشغل لحسابك، ومكنتش أعرف مين بيكلمني، ففضلت أهزر معاه وافتكرته حد من أصحابي، فقالي انت عارف أنا مين، أنا عادل إمام، ساعتها كنت زي الطفل اللي بتقوله احنا هنروح المصيف دلوقتي، وفضلت أهلل في العربية أكتر من الطفلة الصغيرة، وكان ناقص أرقص في العربية».
وأوضح أنه اعتذر عن المشاركة مع «إمام» في مسلسل «أستاذ ورئيس قسم»؛ بسبب ارتباطه بأعمال أخرى، متابعًا: «دعاني للذهاب إلى منزله بالساحل، فقعدنا 4 أو 5 ساعات، واتكلمنا في كل حاجة، وفضلت قاعد معاه من بالليل لتاني يوم الصبح برغم إن كان عندي تصوير الصبح».