المدير الإداري لبيراميدز: «احنا أبطال ظلم وحر ومنشطات وهمية»

آخر تحديث: الثلاثاء 23 يوليه 2024 - 3:46 م بتوقيت القاهرة

محمد جلال

شن أحمد زاهر المدير الإداري لنادي بيراميدز، هجومًا على مسؤولي الكرة المصرية في اتحاد الكرة ورابطة الأندية بعد الهزيمة من الأهلي مساء أمس الإثنين بهدف دون رد.

وكتب أحمد زاهر عبر حسابه الشخصي بموقع التواصل الاجتماعي "فيسبوك" قائلا: "والله أبطال إن احنا بننافس، العب من غير الشيبى ده موقوف حاضر، العب من غير رمضان صبحي وهو في أعلى فورمة وكان رايح منتخب بحجة منشطات وهمية حاضر".

وأضاف: "إبراهيم عادل واحد من أحسن اللاعيبة في مصر هيلعب معاك وبعدها يسافر، لا معلش ده مصاب يوم 12 ويلعب مع المنتخب 14 سبحان الله مع إن حقي إنه ميروحش خالص، بس برضه حاضر".

وأكمل: "أكتر حاجة مضحكانى فى موضوع إبراهيم عادل تصريحات عضو مجلس الجبلاية إن اتفاق لعب إبراهيم عادل اللي هو حقي أصلا وممكن ما يسافرش عادي بقرار مني كان بعلم المنافس طب هو ماله بالموضوع أصلا".

وواصل المدير الإداري لبيراميدز: "إعادة شوط سموحة مع إن اللائحة واضحة وبتقول المباراة تحتسب لبيراميدز بس برضه تاني حاضر".

وتابع أحمد زاهر منشوره "أول فريق يلعب بعد التوقف الدولى بيومين مع إن عنده نص الفريق مع المنتخبات في مخالفة صريحة للائحة حاضر".

وأضاف "أنت لازم تلعب الساعة 4 وبعدها 5 ونص في عز الحر مع إني بنافس ، بس المنافس يلعب عادي بالليل حاضر"

وواصل "معلش أصل حكم مباراة المقاولون المفروض ميحكمش كارت معاهم لوقت اللزوم نطلعه".

وأتم "ظلم واضح من حكام مباراتين الدوري ويقولك الدوري ذهب لمن يستحق، ناس في الرابطة واتحاد الكرة طلعوا يهاجموا النادي لمجرد إنه بيدور على حقوقه وتقولي منافسة إحنا أبطال والله".