على كل واحد فينا أن يعرف مقر اللجنة الانتخابية من موقع اللجنة العليا للانتخابات: http://www.elections2011.eg/ أو بالذهاب إلى أقسام الشرطة أو المحاكم الجزئية. عادى خالص زى ما بنعرف أى معلومة عن أى مصلحة شخصية.

على كل واحد فينا أن يعرف رقمه المسلسل من الموقع السابق أو برسائل تليفونية قصيرة يتم الاعداد لها الآن عبر التليفون المحمول وفى كل الأحوال الكشوف ستكون معلقة أمام الأقسام والمحاكم الجزئية والمرشحون سيكون لهم مساعدون كى يقولوا لك المعلومة. عادى خالص ده مجرد رقم سيساعدك داخل اللجنة علشان نوفر شوية وقت.

تأكد أن تأخذ معك بطاقة الرقم القومى. عادى خالص دى المفروض إنها أصلا موجودة فى المحفظة أو شنطة اليد.

ستذهب إلى اللجنة، عادى خالص زى ما بنروح لأى مكان، بس نروح مبكرا قدر المستطاع.

سنقف فى الطابور، وسنقف فى آخره احتراما لمن جاء قبلنا، عادى خالص مثلما يحدث فى الدول المحترمة.

ستدخل على القاضى والسادة المعاونين له، نقول لهم السلام عليكم، وربنا يجعله يوم جميل علينا جميعا. عادى خالص، زى ما بتكون داخل على حد بتحترمه وبتحترم دوره فى خدمة بلده.

سيقوم القاضى بالكشف عن اسم حضرتك فى الكشف وفقا للرقم المسلسل اللى المفروض إن حضرتك تكون عرفته وسيتأكد من مطابقة الاسم مع الرقم القومى، عادى خالص زى ما بنعمل فى أى جهة حكومية أو بنك.

القاضى يتأكد أن الاسم صح من واقع بطاقة الرقم القومى، ولن يسمح لأى مواطن بالتصويت إلا بموجب بطاقة الرقم القومى. عادى خالص، علشان ما حدش ينتحل شخصية حد.

حضرتك هتوقع أو تبصم فى الكشف أمام اسمك، عادى خالص علشان ماحدش يعطى صوته مكان حضرتك.

حضرتك ستأخذ بطاقتين ورقة للانتخاب بالقوائم وورقة للانتخابات بالفردى (كل واحدة بلون مختلف)، عادى خالص علشان ما نلخبطش الدنيا.

حضرتك ستذهب إلى وراء الستارة وتعلم على الورقة المخصصة للفردى علشان تختار شخصين فقط: واحد عمال أو فلاحين وواحد فئات (غالبا ستتعرف عليهم بالاسم أو بالرمز الانتخابى، زى رمز السيارة أو رمز الطائرة)، عادى خالص بتحصل فى كل المجتمعات اللى فيها نسبة أمية عالية.

وأثناء ما حضرتك وراء الستارة ستجد معك ورقة أخرى خاصة بالانتخابات القائمة، حضرتك هتعلم على قائمة واحدة. عادى خالص علشان إحنا عندنا نوعين من الانتخابات، انتخابات بتختار فيها لاعب واحد (انتخابات الفردى)، وانتخابات بتختار فيها النادى اللى حضرتك بتفضله (انتخابات القائمة).

تاخد الورقتين إلى الصندوقين اللى أمام القاضى وتضعهما فى الصندوقين أو تعطيهما له وتطمئن أنه وضعهما فى الصندوقين، طبعا نركز ألا نضع ورقة الفردى فى صندوق القائمة أو العكس. عادى خالص، هذا هو معنى أن كل صندوق يكون تحت إشراف القاضى. نغمس أحد الأصابع فى الحبر الأحمر، عادى خالص علشان نعرف لما حد يكون ناوى يعطى صوته أكثر من مرة. ممكن حضرتك تفكر السادة الموظفين بأهمية أن يتم رج الزجاجة التى فيها الحبر الأحمر كل فترة علشان المادة الفعالة بتترسب تحت، عادى خالص، دى مش مؤامرة ولا حاجة من الشركة المنتجة للحبر، لكن هذه هى طبيعة الأشياء.

تقول للقاضى وزملائه من الموظفين: السلام عليكم وشكرا على أنكم بتخدموا بلدنا. عادى خالص لأن المفروض الناس بتعامل بعضها باحترام.

بعد حضرتك ما تخلص، اخرج بسرعة كى تعطى فرصة للآخرين أن يمارسوا حقهم، ولا تتحدث مع أى شخص عمن أعطيته صوتك، ولا تسأل أحدا عن تصويته. عادى خالص، لأن هذا «اقتراع سرى مباشر». مش من حق أى حد إنه يتطفل عليك علشان يعرف منك أى حاجة، وأنت كمان احترم حق الناس فى أن تقرر ما تشاء بدون الإفصاح عنه، ببساطة «ما تبقاش حشرى، وما تخليش حد حشرى يتطفل عليك».

هذه كانت الإجراءات، وقطعا سنحتاج عمود أخرى نتكلم فيها عن الآداب وآخر عن المخاوف، عادى خالص، لأن المقالة لها عدد محدود من الكلمات لا أستطيع تخطيه.