قال الفنان محمد صبحي، تزامنًا مع الاحتفال بذكرى نصر أكتوبر، إن البلاد شهدت نهضة فنية حقيقية عقب انتصار 1973، معقبًا: "نفسي إننا نعتز بمصر أكتر من كده".
وأضاف "صبحي"، في مداخلة هاتفية لبرنامج "الحكاية"، المذاع عبر فضائية "إم بي سي مصر"، مساء الأحد: "اللي حصل في 6 أكتوبر إننا مسبناش الشارع، كلنا كنا بنتجمع عشان نتابع ونفسنا نفرح، إحنا جرينا ولقينا الناس كلها واقفة في الشارع وعند بتوع القصب والقهاوي".
وتابع: "ساعات الأجيال الجديدة بتعتقد إنها الوحيدة اللي عاشت المأساة، لأ دي فيه أجيال قبل كده دفعت تمن كبير أوي، انتصاراتنا شبابنا مشافوهاش، وكسرتنا برضة مشافوهاش".
وعقب: "أنا اتولدت في حرب 48 ودخلت ابتدائي في 1956 وإعدادي في حرب اليمن، ودخلت ثانوي في 1967 واتجوزت في حرب 73 وأول حفيدة ليا في حرب الخليج"، معقبًا أنه كان قد حدد موعد زفافه في 6 أكتوبر، لكنه تأجل فيما بعد.