ألقت الفتاة روضة وليد، البالغة من العمر 9 سنوات، قصيدة صباح اليوم الأربعاء، وذلك ضمن فعاليات النسخة الخامسة من احتفالية «قادرون باختلاف»، بمركز المنارة للمؤتمرات الدولية.
وطلبت الفتاة من الرئيس عبدالفتاح السيسي، أن يخبرها برأيه في إلقائها للقصيدة، قائلة: «عاوزاك بعد ما تسمعها تقول لي رأيك في إلقائي بس بصراحة متجاملنيش، ممكن؟».
وجاءت كلمات القصيدة كالآتي:
صباح الفل على بلدي وعلى العالم وكل مكان
أعرفكم بنفسي وأقول لحضراتكم أنا إنسان
يجوز عندي اختلاف لكن من قالوا إنه شخص ضعيف
مدام بحلم فأنا موجود مدام عايش فليا كيان
آه مختلف بس اختلافي في العيون مش في الحياة
مولود بقدرة ربنا اللي خلقني إنسان
مش أداة أنا عندي قلب جميل أوي وعندي حلم جميل أوي
ومعايا رب الكون سند ويا بخت من ربه معاه
المستحيل مش مستحيل المستحيل ممكن يكون
بس أنتوا شوفوا بقلبكم ومتحكموش حكم العيون
علشان أنا ميهمنيش غير إني بس أكبر وأعيش
ولكل واحد شافني عاجز إنكم لا تعلمون
أصل الحياة دي اختبار من ربنا
وأنا راضي بنصيبه الجميل وسعيد كمان
أنا عارف إني اتخلقت عشان هدف
وأنا هنا أهو بسعى أجيب الامتياز في الامتحان
كل اللي نفسي أحققه إن انتوا بس تصدقوا
إن الجمال مش في المظاهر الجمال جوا الكيان
محدش فينا عمره اختار ملامح شكله من برا
خلقنا ربنا بإيديه وسوانا لكن إحنا اللي بنقرر جمال القلب جوانا
فلو عاوزين تحاسبونا حاسبونا على قلوبنا
ولو أمكن تأخذونا على اللي مكنش بأوان
ياريت تشوفوني زي أمي ياريت كل البشر هي
أنا بشكرها من قلبي عشان زرعت أمل فيا
بحبك يا أم قلب أصيل يا اللي شايلاني بصبر طويل
وعلمتيني إني جميل وهونتيها في عينيا
بشكر كل أم وكل أب وكل شخص جميل كان سبب في سعادة القلوب الجميلة دي
وأعرب الرئيس السيسي عن إعجابه بالقصيدة، متوجهًا بحديثه للفتاة: «عاوزاني أقول رأيي، القصيدة جميلة أوي ومعناها جميل أوي وإلقائك زودها جمال، وبطلب إنك تقوليها تاني، تسمعينا وتعلمينا».
ويشهد الرئيس عبدالفتاح السيسي، صباح اليوم الأربعاء، احتفالية «قادرون باختلاف» لذوي الهمم وأصحاب القدرات الخاصة، في نسختها الخامسة، بحضور عدد من الوزراء وكبار المسئولين.