علق الإعلامي عمرو أديب على انتقادات البعض لمقاطع الفيديو المتداولة للاعب العالمي محمد صلاح، وهو يرقص مع الفنان أحمد سعد، على أغاني الأخير، قائلًا إن الأمر ينم عن «مرض نفسي».
وقال خلال تقديمه لبرنامج «الحكاية»، المذاع عبر فضائية «MBC مصر»، مساء السبت: «اللي عملوه بعض الناس في محمد صلاح وأحمد سعد من إمبارح لحد النهاردة أقل ما يقال عليه إنه مرض نفسي.. ناس حقودة وجواها سواد».
وأضاف: «راجل بيتفسح وسعيد ويرقص ويغني إيه الفكرة والحالة؟ في ناس علقت: (بدل ما تروحوا هناك سددوا ديون مصر)، هما دول معاهم فلوس يسددوا ديون مصر؟».
ونوه أن البعض طالب بتجريد «صلاح» من لقب «فخر العرب» وإطلاق أي لقب آخر عليه، بينما يسعى البعض الآخر لتحقيق أهداف أخرى، مضيفًا: «الناس تنبسط وتروح وتغني وترقص، هو واخد فلوس منك أو واخد منك حاجة أو عاملك مشكلة؟ ده في اليونان!».
وروى أنه رأى «صلاح» أثناء فترة تدريباته وما يبذله من مجهود مضنٍ طوال العام، مستطردًا: «هو حر يروح يتفسح ويلعب ويهزر ويعمل اللي هو عاوزه، جرا لكم إيه، سيبوا الناس في حالها وخليكم في حالكم، هو ده اللي هيصلح البلد!».
واختتم: «لو محمد صلاح وأحمد سعد مراحوش رقصوا في اليونان البلد هتتصلح بكرة؟ أيوة شايفين الناس عايشة إزاي، روح أي مصيف في راس البر أو إسكندرية وبلطيم الناس بترقص وتغني وسعيدة وكل حاجة، إيه المشكلة يعني».