ألو.. مساء الخير يا أستاذ محمد.. هنا مكتب اشتراكات وزارة النقل.. باكلم حضرتك بخصوص رسالتك.. أيوة بتاعة القنبلة.. زعق شوية الخط مش واضح.. أيوه يافندم حقيقى.. الوزير وعد باشتراك سنة لكل واحد يبلغ عن قنبلة.. لأ الاشتراك ما بياخدش وقت.. بيطلع على طول.. بنبعت لك خبير مفرقعات من الداخلية وبعدها حضرتك تاخد صورتين ورقم الاستمارة اللى هاديهولك لأقرب محطة مترو يعملوه فى خمس دقايق..

لأ البطاقة مش مطلوبة.. معظم المبلغين مامعاهمش بطايق ومعالى الوزير لغى الشرط ده تسهيلا على المواطنين الشرفاء..

لحظة اعطى حضرتك الرقم.. خليك معايا على الخط.. يا وديع.. آخر نمرة فى الكشف كام؟..

معايا يا أستاذ محمد؟.. رقم حضرتك 4389873.. أيوه يا فندم.. كل دول قبلك فى الكشف.. المواطنين الحمد لله متعاونين فى التصدى للإرهاب وبلغوا عن عدد كبير جدا من القنابل.. لا يافندم.. ملتزمين بوعد سيات الوزير مهما كان العدد ومش هنقلل مدة الاشتراك.. سياته قال سنة تبقى سنة.. لأ.. مش شهر ولا تلات شهور... لو علينا نعملها مدى الحياة..

بتقول إيه؟.. تبلغ عن قنبلتين؟.. طبعا طبعا.. زيادة الخير خيرين.. احنا نكره؟!.. للأسف لأ.. ما ينفعش تاخد اشتراك سنتين.. بس ممكن تسجل القنبلة التانية بإسم المدام أو حد من الأولاد.. أعزب؟.. طب الأخ؟.. معقولة؟ سرق الورث؟.. ربنا يكون فى العون.. الأحسن تحتفظ بالقنبلة التانية معاك وتسجلها بعد سنة.. لأ.. قبل اشتراك القنبلة الأولى ما يخلص بيومين واللا حاجة.. آه العرض مستمر.. لا شكر على واجب دى بلدنا وانتو أهلنا يا مصريين.. لأ عادى معظم الناس بيلاقوا أكتر من قنبلة.. وحماس الناس.. لأ بلاش حماس.. حب الناس للوطن بيخليهم يسجلوا القنبلة الأول وبعدين يروحوا يدوروا عليها.. لأ.. الاشتراك ياخدوه بعد ما نبطل مفعول القنبلة.. قرار الوزير واضح.. لازم يكون البلاغ إيجابى..

إسم حضرتك إيه يا أستاذ محمد؟.. عارف إن إسمك محمد.. محتاجين الإسم الرباعى.. لأ مش صابر الرباعى.. لأ.. ما ينفعش تاخد الاشتراك وتفكر فى إسمك على راحتك.. أيوه تمام.. محمد سيد صابر حماد.. العنوان؟.. ٢٣ شارع المشروع، المطرية، القاهرة.. لحظة معايا نتأكد إن البلاغ إيجابى حسب القرار.

مكان القنبلة فين؟.. فى المطبخ؟.. زرعوهالك فى المطبخ؟.. أه فهمت.. لقيتها قدام البيت وجبتها المطبخ.. اوصفهالى حضرتك.. غريبة قوى.. كل المبلغين عندهم نفس الوصف.. علبتين بلاستك، وشريط لاصق، وبطارية، وشوية أسلاك كهربا ملونة، ومنبه على الجنب.. أيو يا فندم عارف إنها «بدائية الصنع».. حضرتك متأكد أنها قنبلة مش حركة معمولة تهويش؟.. يا فندم ده سؤال روتينى.. قنبلة فعلا؟.. حضرتك ماسكها دلوقتى؟.. طب شايف المنبه اللى فى الجنب؟.. الأسلاك واصله كويس؟..ممكن تتأكد آه.. بس ما تشدش قوى.. فيه سلك ملمس خفيف؟..ممكن مش هيحصل حاجة.. دى بدائية الصنع.. بس بالراحة.. ما تشدش جامد.. لأ بلاش الاحمر.. باقول الاحمر.. إيه ده؟.. إيه الصوت ده؟ يا ساتر يارب.. يا ساتر.. ألو.. لا حول ولا قوة إلا بالله.. ألو.. ألو..

(يضع السماعة)

يا وديع.. 4389873 خلاص.. شيله من الكشف.. أيون.. إيجابى برضه..

فاضل لنا كام واحد كده؟