إحنا كمصريين دايما مشهورين بتضخيم المواضيع.. مزاج عندنا التهويل وأسهل وأسرع حاجة بنعملها قدام أى موضوع بسيط إننا نعمل من الحبة قبة..إيه بقى الكلام الكبير اللى بيتقال عن حالات الضرب فى المدارس ده؟..

الكل شايف إن دى حاجة سلبية ومشكلة لازم وزارة التعليم تتصرف بسرعة وتحلها.. اللى إنتوا ماتعرفهوش إن الموضوع ده لا هو جاى بالصدفة ولا هو حاجة عشوائية..ده نتاج لدراسة وتخطيط عكف عليهما أكبر خبراء التعليم فى مصرنا المحروسة..

الخبراء الأجلاء اكتشفوا إن الجيل ده كله طالع خرع ومايص..بدل الكورة الشراب بيلعبوا بلاى ستيشن وبدل الساحات الشعبية بيروحوا نادى الصيد والجزيرة وبدل برامج ماما نجوى وبابا ماجد بيتفرجوا على ماما هايفا وأبيه مهند..

العيال دى لو اتسابوا بالشكل ده هيضيعوا هيبة مصر قدام العالم.. ولا مصرى يقدر يرفع راسه بعد كده ويقول أنا ابن تحتمس أو رمسيس ولا حتى غمرة.. ولهذا كانت توصيات الخبراء اللى بتنفذها الوزارة حاليا بكل إخلاص وتفانى.. إيه يعنى لما ابنك يرجعلك بعد حصة العربى ناقص رجل؟.. طالما هيتعلم القوة والجلد.. وإيه اللى هيجرى يعنى لو مدرس التاريخ اتحمس شوية وطيرله دراع طالما بعدها هيعرف مصلحته؟..مافيهاش حاجة لو عين من عيونه اتصفت فى حصة الإنجليزى؟.. عين إيه وبتاع إيه ماهو عنده واحدة تانية..لكن يظل المبدأ: To b or not to b that is the question.

كفايانا بقى تهويل للى بيحصل فى المدارس.. ماتبقوش شعب خيخة وأى كلام.. اخشوشنوا وخشنوا العيال.. من أجل مستقبل مشرق ملىء بالعاهات. أأ.. قصدى بالنجاحات لبلدنا الحبيب.

والآن، مع نشرة الأخبار: ــ مصدر غير مهم بوزارة التعليم يصرح: مدارسنا بخير ومش عايز أى كلب يقول غير كده ــ بعد أن انفردنا بإعلان نتائج امتحانات الكادر نحن أول من ينفرد بإعلان نتائج اختبارات حمل السلاح الأبيض للمدرسين الجدد ــ انخفاض ملحوظ فى نسب التلاميذ أصحاب العاهات الناتجة عن الضرب بسبب القرار الحكيم من وزارة التعليم بفصل الإنتاج عن الترزيع وبالنسبة لأعداد التلاميذ المصابين المتوقعة غدا فى أنحاء الجمهورية: القاهرة العظمى 240 والصغرى 119.. الجيزة العظمى 230 والصغرى 107.. سوهاج ــ عشان الدنيا حر والمدرسين صعايدة ــ العظمى المتوقعة 1011 والصغرى 950..كانت هذه نشرة الأخبار، والعاقبة عندكم فى المسرات.