أوكازيون خاص للحسنات أقيم ليلة أمس.. فرصة لا تعوض إن لم تغتنمها هذا العام فستندم عليها على الأقل حتى يأتى ميعادها العام المقبل.. ليلة القدر خير من ألف شهر.. فى الغالب حضرتك قضيت ليلة امبارح فى المسجد القريب.. تقوم الليل وتقرأ القرآن وتصلى وتبكى خلف الإمام.. صليت كام ركعة؟ طبعا أنا متأكدة إنك خشعت فيهم؟.. بكيت فيهم مع الإمام بجد..

افتكرت ذنوبك وندمت على اللى ظلمتهم وفكرت فى عذاب ربنا وتمنيت رحمته أكيد يعنى ما كنتش بتعيط عشان الكل بيعيط وهايبقى شكلك وحش لو ما شاركتش إنت كمان.. رفعت إيديك ودعيت.. لنفسك أو على حد ظالمك ومنكد عليك.. يمكن تكون كمان دعواتك تخطت المصلحة الخاصة وافتكرت فيها الشأن العام فافتكرت تدعى على بتوع إعلانات الضرايب والبنوك اللى بيفكروك دايما إنك أساسا مش لاقى تاكل..

وعلى السبب فى إنك بقالك إنت وعيالك سنين وسنين بتاكلوا خضار مزروع بمياه الصرف الصحى، وبتستغرب هى صحة العيال بايظة ليه وعلى السبب فى إهدار فلوسك فى إنتاج عشرات المسلسلات اللى فشل معظمها فى إنه يوصلك أى قيمة أو معنى وخلاك تترحم على أيام فوازير القناة الأولى ومسلسل القناة التانية وشكرا بدل الخايلة الكدابة دى.. يمكن دعيت على الفساد والفاسدين والتزوير والمزورين لو كنت غاوى سياسة مثلا.. أو دعيت ربنا إنه يديم علينا أزمة البث الفضائى ده لو كنت من مشجعى نادى الزمالك.. قريت قرآن كتير؟.. أكيد برضه تدبرت معانيه وفهمت إنت بتقرا إيه؟.. مش معقول كنت بتقراه بس عشان داخل مسابقة مع نفسك هتخلص أد إيه..

طلعت فلوس لله؟.. افتكرت قرايبك اللى بقالك شهور ما سألتش عليهم؟.. زرت المريض؟.. سألت على الغايب؟.. ساعدت المحتاج؟.. أكيد عملت كل ده وأكتر وأخلصت جدا فى العبادة فى الليلة دى طب وما سألتش نفسك وانت بتعمل كل ده (لو كنت عملته يعنى) إنت ليه بتعمل كده ليلة واحدة بس كل سنة؟.. طب والليلة اللى قبلها والليلة اللى بعدها والأسبوع اللى جاى واللى بعده وبقية السنة؟.. خلاص كده عملت اللى عليك؟.. ليلة القدر خير من ألف شهر.. لو كنت أخلصت فيها هاتعوز إيه أكتر من كده؟..

وأنا تلميذة فى ابتدائى سألت أبلة سهير (مدرسة العربى والدين وإحدى ضحايا التعليم الحكومى) ليه ربنا عملنا ليلة قدر واحدة بس فى السنة كلها؟.. ردت عليا ببساطة «عشان ربنا عارف إننا ما نقدرش نعبده بذمة غير يوم واحد فى السنة».. ورغم بشاعة الإجابة فإن فيه ناس كتير فعلا مؤمنين بكده على الأقل من جواهم.. من المقالات المثيرة اللى قرأتها وأنا باعمل بحث على الإنترنت عن فضل ليلة القدر وحكمة ربنا من وجودها بعيدا عن إجابة أبلة سهير لقيت مقال بيقول إن ربنا برحمته إدانا ليلة القدر لأن أعمارنا فى تناقص مستمر، فربنا بيعوضنا بليلة واحدة تعوض فرق العمر بيننا وبين الأمم السابقة لنتساوى معهم فى الفوز بوقت كاف لعبادة الله.. إحنا أعمارنا بتنتهى ــ بإذن الله طبعا ــ بين الـ60 والـ80 مثلا، ومن المفترض إننا بنقضى معظم السنين دى فى عبادة الله، ضيف عليهم عبادة ليلة القدر اللى لو صادفت وأوفتها حقها مرة واحدة فى حياتك (لأنك بتنشن طبعا على ليلة 27 وغالبا ما بيهونش عليك تخلص فى العبادة شهر رمضان كله ولا حتى العشر الأواخر كاملين) فوقتها هتضيف لعمرك ألف شهر من العبادة يعنى 83 سنة، فتكون النتيجة هى 150 سنة على الأقل من عبادة الله..

رأى ما سمعتوش كتير وما عنديش فكرة عن صحته.. لكن أتمنى إنه يوصل لكل إنسان.. ليلة القدر يمنحك فيها الله فرصة أكبر للعبادة والخشوع واتقاء الله.. وهى بالتأكيد ليست بديلا عن بقية أيام السنة.