أينعم.. الليلة بالذات مصر بتتأخر بينا 60 دقيقة كاملة.. بمناسبة حلول شهر رمضان كل سنة وإنت طيب ونتيجة لبعد نظر الحكومة اللى خلاها تستوعب إن الناس ممكن تستحمل كل اللى بيجرالها حاليا لكن لو الحكومة أجبرتهم يفضلوا صايمين للساعة 8 مساء طول رمضان غالبا هيفرقعوا فى وشها..

طب ليه بنقدم ونأخر الساعة أصلا وعلى أى أساس؟.. برافو عليك.. سألت السؤال المناسب للشخص المناسب الحقيقة.. مش لأنى مركز قوى فى البلد ولا خبيرة ساعات ولا حاجة لكن لأنك ببساطة لو سألت أى حد من اللى فى إيدهم تغيير الساعة فعلا غالبا ماحدش هيرد عليك ففى النهاية مافيش قدامك غيرى أنا..

أولا مقدمة تاريخية: بدأ تغيير الساعة فى العالم فى الدول المشاركة فى الحرب العالمية التانية نظرا لحاجتهم لزيادة ساعات العمل فى المصانع الحربية لإنتاج المزيد من الأسلحة تماشيا مع ظروف الحرب وبما إن بريطانيا واحدة من الدول دى وبما إنها كانت محتلة مصر فى الفترة دى، ففى سنة 1941 طبق نظام تغيير الساعة فى مصر وبعد انتهاء الحرب وانتهاء الغرض منه تم إلغاؤه فى مصر.. تقوللى رجع تانى ليه سنة 57 أقولك..

الحقيقة ما أعرفش.. طب ليه رجع اتلغى سنة 59؟ ماعنديش أدنى فكرة.. طب ليه رجع 82 ولغوه تانى 85 ورجعوه طبقا لقانون رقم 140 لسنة 1988 والمعدل بالقانون 14 لسنة 95؟ أقولك.. عشان هم الحكومة.. حد شريكهم؟ ولاّ إنت هتعرف مصلحتك أكتر منهم ؟.. أكيد كل سنة طبقوه فيها كان عندهم سبب مقنع وكل سنة لغوه فيها كان عندهم سبب أكثر إقناعا.. من المفترض مثلا إن كل مرة بنطبق فيها النظام الصيفى بنوفر فى استخدام الكهربا..

الدنيا ما بتضلمش غير بعد 8 يعنى فيه ساعة كاملة ممكن توفرها كل يوم ما تستخدمش فيها الإضاءة.. للأسف طبعا النظام ده ما ينفعش عندنا لأننا نعيش فى دولة من الدول الحارة فبنستخدم المراوح والتكييفات 24 ساعة فى الصيف وكل المحال التجارية بتسهر للصبح.

فالمشكلة بتزيد مش بتقل لكن دى مشكلتنا إحنا.. الحكومة بتعمل اللى عليها وما يقدر ع القدرة غير ربنا.. من المفترض كمان إن كل سنة بنقدم فيها الساعة بنزود ساعات العمل ساعة واحدة فى يوم واحد فى السنة على أساس إننا بنشتغل على مدار الــ 24 ساعة وده طبعا فيه فايدة كبيرة جدا للاقتصاد المصرى..

ساعة عمل زيادة يعنى بتاع 2 جنيه وربع كده.. رضا!.. الفايدة الفسيولوجية بقى لموضوع تغيير الساعة هى فى توافق ساعة ذروة نشاط الإنسان مع ساعات اليوم الأكثر إضاءة.. يعنى إيه بالظبط من فضلك ماتسألنيش.. لكن أكيد حاجة مهمة برضه.. المهم اقتنعت أو ما اقتنعتش الساعة هتتغير النهارده بالليل..

أنا باقولك أهه عشان ما تروحش يوم السبت شغلك فى غير معادك وتبقى حجتك إن ماحدش قالك.. كمان خد بالك إن فيه شوية شائعات بيقولها بعض أساتذة الطب وبينبهوا فيها إن تغيير الساعة مضر جدا بالساعة البيولوجية للإنسان ويؤثر سلبا على إفرازات بعض الغدد ويسبب حالات اضطراب المزاج والعصبية وعدم القدرة على السيطرة على الانفعالات وسرعة الغضب ورمضان داخل وأى حاجة من دول ممكن تبوظ صيامك..

ده غير إن تغيير الساعة غالبا هيلخبط مواعيد مسلسلات رمضان اللى مش هتقدر تظبط مواعيدها على الفضائيات المختلفة.. لكن زى ما قلنا دى مجرد شائعات مش لازم تلتفت إليها فى ظل تأكيد الحكومة لفائدة هذا النظام ولأن قائليها غالبا ليسوا أعضاء فى الحزب الوطنى.