- والله مؤامرة. أنا إعلامي وفاهم باقول إيه. المسائل ما تتاخدش بالظواهر. دي مؤامرة متكاملة الأركان.

- مش فاهم ازاي يعني؟ جمال خاشقجي دخل القنصلية ومخرجش. مؤامرة من مين؟

- مش عارف من مين؟ من الخليفة قردخان. بذمتك مش صاحب مصلحة؟

- أي خصم للمملكة هيبقى صاحب مصلحة لكن مش معنى كده انه ارتكب الجريمة.

- انت ساذج. مش شايف ترمب بيعمل إيه؟ كله عاوز يقبض. أوروبا كلها واقفة طابور وبتسأل على الراجل.

- حتى لو صحت فكرة ان هناك من يحاول الاستفادة من الوضع وبيضغط للحصول على مكاسب، ده مش معناه إنهم ارتكبوا الجريمة.

- هو انت مش عارف إردوغان عامل إيه ف الصحفيين عنده؟ مش شايف الاعتقالات والناس اللي بتحتجز والشباب اللي في السجون؟
- فين ده؟

- في تركيا طبعا.

- معلش سرحت شوية. بس ده علاقته إيه؟
- واضحة. هو اللي عملها وخطف جمال.

- خطفه منين. جمال اتصور وهو داخل القنصلية. مالوش صورة وهو خارج.
- ممكن خطفوه من الداخل. مش فيه أتراك بيشتغلوا داخل القنصلية؟ أكيد متآمرين انتظروا خاشقجي في الداخل وخطفوه وهربوه من غير ما حد يشوفه. ده ممكن هو كمان يتعاون معاهم علشان يورطوا المملكة ويحرجوها قدام العالم.

- انت شايف ان ده منطقى؟

- طبعا. انت بس اللي مش مركز ومش واخد بالك من المناحة اللي الإخوان عاملينها. دي لوحدها أكبر دليل على إن الموضوع مش تمام وإن القصة دي هدفها الوحيد إحراج السعودية وإعطاء قطر وقناة الجزيرة فرصة انهم يوجهوا ضربة للسعودية.
- يعني انت مستبعد تماما احتمال قتله داخل القنصلية؟
- يا أستاذ أنا إعلامي محترف عيب. الكلام ده ما يخيلش علي. يتقتل داخل القنصلية ليه؟ لو مطلوب قتله مش كان ممكن يتقتل في مشاجرة في الشارع؟ يتحدف من البلكونة من الطابق العشرين، يتحط له متفجرات في العربية؟ معقولة يعني حد يستدرجه داخل القنصلية علشان يعمل العملية المستحيلة دي؟ شغل دماغك شوية.

- معلش انا أصلي مش إعلامي محترف زي حضرتك وباشغل دماغي على قدي. الراجل دخل وما خرجش هيبقى راح فين؟
- بص يابني. مادام في القنصلية قالوا إنه خرج يبقى خرج. خرج مع الأتراك اللي هربوه، أو خرج عادي بعد ما خلص معاملاته.. المهم انه خرج.
- لبس طاقية الإخفاء يعني؟! خرج فين؟ ما طلعوش فيديو الخروج ليه؟

- مش باقولك انت ساذج. تفتكر الأتراك اللي بيشتغلوا في المؤامرة من جوة السفارة عملوا إيه غير تعطيل الكاميرا؟! صوروه داخل وعطلوا الكاميرا وهو خارج.

- طب وخطيبته اللي كانت منتظرة بره وما شافتوش؟

- انت فعلا ساذج بس معذور. لو انت إعلامي محترف كنت عرفت ان خطيبته دي مخابرات ومدسوسة على القصة كلها علشان تعمل الشو الإعلامي ده كله.
- استنى لحظة. إيه ده؟؟؟ بص في الموبايل.. فيه بيان طلع حالا بيقول إن جمال اتقتل فعلا في السفارة.
- طبعا الأتراك هم اللي مطلعين البيان والجزيرة بتذيع!
- لأ. ده صادر عن النيابة العامة السعودية. بيقول إن فيه مناقشات تمت بين جمال وبين أشخاص قابلوه أثناء تواجده في قنصلية المملكة في اسطنبول. وإن المناقشات تطورت إلى شجار واشتباك بالأيدي أسفر عن وفاته.
- اشتبك مع الأتراك اللي في السفارة أكيد.
- إطلاقا. بيان النيابة بيقول إن فيه تحقيقات مع موقوفين على ذمة القضية بلغ عددهم حتى الآن (18) شخصاً جميعهم من الجنسية السعودية.
- …
- ساكت ليه؟
- يا أخي الأتراك دول مجرمين فعلا.
- نعم؟!!!
- شفت وقعوا الناس في بعضها ازاي. باقولك دي مؤامرة كبيرة ومترتبة.
- ...