كتير جدا بنبقى كدا، عايزين نسافر وننبسط على قد الفلوس اللي معانا والوقت المتاح وخلاص، مش بيبقى فيه مكان معين...

أو عندك ليسته فيها أماكن كتير عايز تروحها وعايز تنقي منها المناسب للوقت والفلوس اللي معاك دلوقتي... دايما دا بيكون حالي، وأظن حالك انت كمان.

في المقال دا، هوريك ازاي حسب الوقت اللي مسافرين فيه نختار أرخص وجهة ممكنة للسفر والانبساط...

عشان تختار أرخص وألطف وجهة ممكنة، لازم تعرف الأول إن فيه مجموعة عوامل هتدخل معاك في اتخاذ القرار:

- الطقس في الوقت دا هيكون كويس في أي مناطق؟

- هل الوقت دا بالنسبة لوجهتك «موسم»؟ لأن في المواسم بتبقى كل حاجه أغلى!

- هل دي مدينة أو بلد أنا عايز ازورها اصلا؟ ولا مش مهتم؟

- هل تكلفة الإقامة والمعيشة عامة في المدينة دي مناسبة للفلوس اللي معايا؟

- تكلفة السفر وتمن تذكرة الطيران نظامها إيه؟

يلا نبدأ...

الطقس في الوقت دا هيكون كويس في أي مناطق؟

بص يا سيدي، عندك وسيلتين هم المفضلين عندي:

1- الويب سايت الرائع: BestTimeToVisit 

زي مانت شايف بيسهل عليك المهمة بشدة، في الجزء اللي فوق بتحددله اختياراتك المفضلة (القارة – متوسط الصغرى والكبرى في درجات الحرارة – الشهر اللي مسافر فيه – احتماليات المطر حتى).

والجزء اللي تحت لو حابب نصيحته بشكل عام تروح فين في الشهر الفلاني..

ودي لقطة سريعة للسيرش اللي انا شخصيا عملته لما كنت مسافر في شهر 10 الي فات:

ايطاليا مكان رائع في شهر 10 !..

1- الوسيلة التانية، ويب سايت رائع تاني اسمه priceoftravel.com ودا أكبر من مجرد استخدامه في النقطة دي وهيبانلك قدام الحاجات الرائعة التانية الكتير اللي فيه...

لكن الموقع دا بشكل شهري بينزل قايمة ممتازة لأفضل مدن رخيصة تزورها في الشهر الفلاني وبيختصر وقت كتير...

فأفضل طريقة إنك تدور على المقال على جوجل باستخدام طريقة متقدمة شوية في البحث ..

انا اختصرت عليك السكة ، كل الي انت محتاجة تدوس على اللينك دا

ولما الصفحة تفتح كل اللي محتاجة بقى تغير السنة لو السنة اتغيرت وبعد «in» تحط اسم الشهر عشان تلاقي المقال اللي انت عايزه على طول.

دا بالنسبة للطقس..

هل الوقت دا بالنسبة لوجهتك، موسم؟ لأن في المواسم بتبقى كل حاجه أغلى!

بص بقى، السؤال دا إجابته مش سهلة وعايزة تدوير كتير، باختصار في حاجه في السفر اسمها الـShoulder seasons، وهي الأوقات اللي ما بين المواسم مش المواسم نفسها، محترفي السفر بس اللي بيطلعوا في الاوقات دي وبيتعمدوها لأن كل حاجه أرخص، وعشان تعرف الأوقات دي لكل منطقة عايزة بحث كتير لأن في عوامل مختلفة لتحديد الـshoulder season، إنه ميكونش معاد من المعروفين للسفر في البلد دي، ميكونش وقت إجازات مدارس،... إلخ.

بالنسبة لأوروبا بشكل عام وحوض البحر المتوسط بشكل خاص، في عرف المشتغلين بالسياحة السنة متقسمة 3 فترات:

-موسم الرواج peak season: ودا من نص يونيو لآخر أغسطس، ودا اللي بتبقى أوروبا فيه الأكثر رواجا، وطبعا زي كل المواسم بيكون زحمة وأغلى شوية من العادي...

-shoulder season: ودي المنطقة السحرية بالنسبالي، من اول أبريل لنص يونيو كدا، وشهري سبتمبر وأكتوبر ودول في تقديري افضل الأوقات لزيارة أوروبا.

-off season الموسم الميت: من نص 10 كدا لغاية مارس، ودا عشان الشتا والبرد بيبقى الاقبال أقل، بس لو انت بتحب التوقيت دا ومعندكش مشكلة معاه، هتذهل من انخفاض التكلفة في كل حاجه في الفترة دي! التكلفة بتكون في الأرض حرفيا!...

بالنسبة لي الـshoulder seasons الألطف، بس عامة خد بالك برده إن المواسم بتختلف من بلد لبلد شوية، فبرده اعمل سيرش كويس قبل ما تسافر لأن مثلا باريس لسبب غامض مابتبقاش زحمة أوي في أغسطس..

بالنسبة لآسيا الموضوع أصعب شوية في التحديد لأنها واسعة وبتختلف حرفيا حسب البلد، بس تدويرة حلوة كدا بالنسبة للبلاد الأكثر شيوعا يعني لقيت التالي:

-بالنسبة لتايوان وهونج كونج وما حولهم: يناير وأول ديسمبر، و شهر 6 و 7 بشكل عام

-اليابان وما حولها: يناير ومايو بشكل عام

-جنوب آسيا: يوليو واغسطس

-الصين: ابريل لحد اواخر يونيو

وأنهي الفقرة دي بهدية بسيطة، دي خريطة عبقرية عاملها احد اهم مواقع السفر للـshoulder seasons حول العالم.

 هل دي مدينة أو بلد أنا عايز أزورها اصلا؟ ولا مش مهتم؟

نصيحتي الشخصية في النقطة دي، اعمل لنفسك Dream to go list، حط فيها كل المدن والأماكن اللي بتحلم تزورها، وبص عليها كل ما تكون ناوي تسافر، احساس لا يوصف وانت شايفها بتقل وبتشطب منها حاجات زرتها خلاص !..

هل تكلفة الإقامة والمعيشة عامة في المدينة دي مناسبة للفلوس اللي معايا؟

هنرجع هنا للموقع العبقري priceoftravel.com اللي جزء من الحاجات اللي بيعملها إنه كل سنة بيعمل ليستة طويلة لأرخص المدن اللي ممكن تزورها حول العالم، وبيعمل دا بإنه اخترع متوسط خاص بيه عبارة عن معادلة بتطلع رقم متكون من أغلب التكاليف المعتادة في السفر بحيث يطلعلك رقم يمثل مستوى غلو المكان، اللينك اهو

وزي مانت شايف، فوقه نفس التقسيمة بس بالقارة أو النوع، ودا كافي جدا للفقرة دي..

تكلفة السفر وتمن تذكرة الطيران نظامها إيه؟ 

نرجع هنا لصديقنا العزيز skyscanner، نستخدم طريقتي المفضلة في البحث عن وجهة:

عشان تعمل اللعبة دي صح ركز معايا في الاختيارات:

1- اختار "البلد" اللي هتخرج منها مش المدينة، اكتب مصر يعني مش القاهرة.

2- سيب الوجهة فاضية متكتبش حاجة

3- في توقيت السفر لما تدوس عليها هتلاقي اكتر من اختيار منهم "خلال أسبوع" أو طوال السنة أو تروح على شهر معين وتختار طوال الشهر، اختار حسب بقى مانت عايز، في مثالنا اخترت أنا شهر يوليو..

نتيجة البحث من مصر لأي مكان في العالم أرخص وجهات زي مانت شايف وهتلاحظ إن عشان في يوليو ملقتش غير انجلترا بس في أوروبا وعامة الأرقام عالية مش قليلة..

وعندك أخوه التاني Kayak فيه خدمة شبيهة:

بكدا أكون زودتك بكل الأدوات اللي تساعدك على اتخاذ قرار وجهتك الجاية، وعشان أشجعك تبدأ رحلتك دلوقتي أهو (بما إننا في offseason) أنهي مقالي بهدية رائعة هوريكم منها Teaser صغير، خشوا على اللينك شوفوا باقي التفاصيل:

هدية صغيرة كدا (متنسوش تقروا الـconditons)

شكرا لـ«أحمد ابو العلا» الي بعتلي اللينك دا

تابعوني على تويتر:

http://www.twitter.com/NourEldin_z3r0

تابعوني على فيسبوك:

http://www.facebook.com/ze3r0