- لأ.. مش معقول انت كمان هتكتب عن موضوع خلع الفنانة حلا شيحة للنقاب!! مش ممكن يكون أهم حاجة يعني!!
- شوفي.. حدث ارتداءها للنقاب أو الحجاب مش مهم على الإطلاق. لكن المعركة اللي دايرة حوالين الموضوع ودلالاتها مهمة.
- مش فاهمة معركة إيه؟ هو فيه حد هيدخل معركة علشان يلبسها النقاب أو الحجاب تاني؟!
- مش هي بشخصها المقصود. المعركة رمزية والهدف هو تخويف أي واحدة عاوزة تاخد قراراتها بنفسها. التيارات الأصولية بتخسر الأرض اللي كسبتها من السبعينيات تقريبا لما نجحت تربط بين الالتزام الديني من جهة، ووضع قطعة من القماش على رأس المرأة وسحبها تدريجيا من الحياة العامة من جهة تانية. الربط بين الدين مثلا والأخلاق في مجملها العام، أو الدين والنظافة، أو الدين والاستقامة والصدق كلها مسائل ما كانتش موجودة على آجندتهم ولا زالت غائبة عنها. الناس في مواقع الإنترنت لها فترة تتداول صور مؤسسي جماعة الإخوان ومشايخ الأزهر وكبار قراء القرآن الكريم من حوالي نص قرن وهم مع زوجاتهم وإخواته وبناتهم بدون حجاب ولابسين نص كم أو بدون أكمام. مش معقول ما كانوش فاهمين الإسلام اللي السلفيين والإخوان اكتشفوه في الكام عقد اللي فاتوا!!
- طب لو سبنا موضوع النقاب على جنب، هل تقدر تنكر كل الأدلة الشرعية الموجودة في القرآن والسنة على وجوب تحجب المرأة؟
- يعني انتي عاوزة تقولي إن كل اللي كانوا في الصور دي ما كانوش عارفين الأدلة الشرعية لحد ما تم اكتشافها مع دخول الإسلام مصر في القرن العشرين؟!
- ده بدل ما تبقى مبسوط ان ربنا هدى الناس للإيمان أخيرا؟ بدل ما تحمده إن المجتمع أخيرا بقى محتشم كما كانت مجتمعات المسلمين في صدر الإسلام؟
- ما هو موضوع الحشمة ومفهومه مسألة متغيرة ومرتبطة بمفاهيم مجتمعية وليست مطلقة زي ما بيتهيألك. واللي انتي فاهمه النهاردة إنه مظاهر ثابتة للحشمة ليس كذلك بالضرورة، ومرتبط في رأيي بفهم خاص بوقته وبعصره.
- يا سلام؟!! يعنى الحشمة دي بتاعة النهاردة.
- شكل المجتمع المسلم وزي أفراده اللي لابسين أبيض في أبيض جاي في دماغك من أفلام فجر الإسلام والشيماء، ولا علاقة له بشكل أزياء المسلمين في المجتمعات الإسلامية الأولى.
- ما هو أكيد مخرجي السينما كانوا بيحاولوا يتصوروا شكل الزي لكن بصرف النظر عن التفاصيل أكيد المرأة كانت محتشمة ومغطية شعرها والمجتمع ما كانش ممكن يقبل إن الستات تمشي شعرهم مكشوف أو الأذرع مش متغطية.
- ده اللي انا باقول إنه تصور عن "حشمة المجتمع" لا يتفق مع واقع الأمر ومربوط بعصره.
- رجعنا للكلام المكعبل!
- ماهو ما تفهمينيش إن مجتمع يقبل إن النساء فيه مش بس يبقى شعرهم مكشوف لكن كمان تبقى صدورهم عريانة، هو مجتمع تتفق قواعد الحشمة فيه مع تصورك المطلق عن الحشمة!! المجتمع اللي بيوقفوا فيه سيدات وبنات عريانين في السوق ويبقى مسموح للرجال انهم يتحسسوا ويتفحصوا قدام اللي رايح واللي جاي، أكيد مش مجتمع عنده نفس مفاهيم الحشمة اللي انتي رابطاها بالإسلام! الحاجات دي كانت بتحصل ومحدش وقتها كان شايف انه عيب وما يصحش أو إنها إهانة للمرأة أو إغراء للشباب أو أي حاجة من اللي الناس بتبرر بيها الحجاب النهاردة. كان بيحصل عادي لإن دي ثقافة المجتمع السائدة وقتها.
- وهو ده اللي بيخليك تشجع خلع الحجاب؟
- وانا مالي!! كل واحدة حرة تلبس زي ما هي عاوزة.
- بعد كل اللي قلته جاي تدعي انك بتأيد لبس الحجاب؟
- زي المرأة حريتها الشخصية. أنا فقط معترض على اللي بيربطوا بين السفور وخلع الحجاب وبين كل الموبقات الأخلاقية. الحجاب في رأيي مش فرض ديني، ولعبة لي التفاسير والمفاهيم لاستنباط "دليل شرعي" على أي حاجة سهلة وبتتعمل على طول. المشايخ بيطلعوا لنا كل يوم بتبريرات بيسموها شرعية لكل أنواع الغرائب والمتناقضات. ده في حد ذاته أكبر دليل على خواء فكرة الدليل الشرعي من المعنى وسهولة استغلالها.
- يعني انت مع الحجاب والا ضده خلصنا؟
- أنا مع حرية الإنسان في اختيار زيه بدون إكراه أو قهر مجتمعي. ومع حريتي في إني أقول إن الدين مش طرحة ولا دقن ولا جلابية. الدين معاملة ومصلحة وتعاون على البر بين الناس.