المؤمنون الشجعان ودوافعهم الدينية
- انت على فكرة متحامل جدا على الإسلام.
- ليه بس؟ ده أنا كل كتاباتي دفاع عن الإسلام وتبرئة له مما ينسبه إليه المتطرفون زورا.
- ده اللي انت بتقوله. لكن بصراحة انت واحد من اللي بيدعموا فكرة إن دوافع ناس زي بتوع داعش أو ولاية سينا من مرتكبي عمليات الإرهاب والتطرف هي دوافع دينية. يعني في الوقت اللي الناس كلها بتبرأ الدين، إنت بتفتح باب الترويج لنسبة هذه الأفعال للإسلام.
- يا راجل حرام عليك! لما بنقول إن اللي بيقتلوا بإسم الدين دوافعهم دينية ده مش معناه إن الدين هو السبب، أو إن الإسلام يحرض على القتل والعنف.
- ازاي بقى؟! لما بتقول الدين هو الدافع، ببساطة بتقول إنه هو السبب.
- اللي بيحدد دافع ارتكاب الفعل هو اللي خطط له ونفذه. لما يقول إنه فعل ما فعله تصديقا وتأكيدا لإيمانه وعقيدته وتعاليم دينه ما نقدرش نتغاضى عن كلامه ونخترع له دوافع تانية.
ـ وده مش إساءة للدين؟! يعني تقبل الادعاء بإن الإسلام هو السبب في أعمال زي كده وتقول لي أنا بادافع عن الإسلام؟!
- الدافع لجرائم من هذا النوع هو تصور شاذ وفهم منحرف لا يتفق مع الإسلام أو القرآن أو تعاليم الرسول الذي بعث ليتمم مكارم الأخلاق. لا يتفق مع أي دين في الواقع لإنه بيفترض إن القتل والتدمير وسفك دم المخالف لرأيك وعقيدتك هو جهاد لإرضاء الرب. من نسب هذا التصور الشاذ للدين هم المجرمون ولست أنا. هم شايفين إن تصرفاتهم تستند للدين، وبالتالي دوافعهم دينية.
- واجب واحد زي حضرتك في الوقت ده إنه يدافع عن الدين مش يثبت الإساءات اللي بيعملوها الناس دول ضده.
- انت أكبر المسيئين للدين على فكرة!
- علشان بادافع عنه ضد إساءات الناس اللي زيك؟!
- علشان بتجتهد في كنس المشكلة تحت السجادة وانت متصور انك بتخدم دينك بدل ما تساعد في إننا نشوف التصورات اللي بتشكل دوافع التطرف دي جاية منين علشان نتعامل معاها ونصححها. التصورات دي مش هتتغير لما تجي لي أنا كل مرة وانت غضبان علشان تبرأ ساحة الدين عندي.
- طبعا لازم انبه الناس لخطورة اللي انت بتقوله.
- طب أنا باقول إن دي مفاهيم مدسوسة على الدين. مش الأحسن تسيبك مني وتروح تحارب اللي بيروج للمفاهيم دي باعتبارها صحيح الدين؟! مش الأحسن تشارك معايا في انتقاد كلام المشايخ اللي بيروجوا لاقتباسات من السلف كتبت في سياق زمني مختلف تماما بيدعموا بيها الآراء الشاذة القاتلة، وبيأيدوا تصور القتلة إن ده هو التدين والجهاد اللي بيرضي ربنا. مش الأفضل تنتقد خطباء المساجد اللي بيساهموا في نشر الكراهية بدعاءهم في كل جمعة على كل من يخالف المسلمين في ملتهم، وتوعي الناس بإن مفيش مؤامرة على العقيدة بقدر ما فيه صراع عالمي على النفوذ والثروة بالدرجة الأولى.
- ياسلام؟!! واسيب الناس اللي زيك يشوهوا العقيدة!!
- لأ انت مش هتسيبنا، إنت المفروض تشارك معانا وتنشر الكلام اللي أنا وغيري بنكتبه في السياق ده علشان تنتصر لرأيك واعتقادك وإيمانك بإن ده مش هو الدين والعنف والقتل مش من الإسلام.. مش بتقول إن ده رأيك؟
- يعني اروج لك بدل ما احذر الناس من كتاباتك المسمومة!!
- اللي بينزعج من كتاباتي هو اللي بيوافق فعلا إن التفسيرات الشاذة دي هي الدين، واللي شايف إن كلام الإرهابيين والقتلة أقرب لـ "الإسلام الصحيح" من التصور الموجود في كتاباتي. في الحالة دي المفروض ما تزعلش من أي حد يقول إن دوافع الإرهابين والقتلة دينية. بالعكس.. لازم تبقى واضح وتدافع عن الدوافع دي لإنك متفق مع القتلة في الفكر والتوجه والفهم. لازم تعترف إن الخلاف الوحيد بينك وبينهم مش في تصوراتهم عن الدين لكن في إنهم عملوا اللي انت لسه ما عندكش الشجاعة تعمله!.. خليك شجاع.