توجهت الفنانة منى زكي بالشكر لكل القائمين على مسلسلها "تحت الوصاية"، الذي حقق نجاحا كبيرا في الموسم الرمضاني 2023.
وكتبت منى زكي رسالة طويلة عبر حسابها الرسمي بموقع "فيسبوك"، تحدثت فيها عن تجربتها، وجاء في رسالتها: "مع انتهاء موسم رمضان حابة أوجه الشكر لجمهوري في مصر والوطن العربي على كل التشجيع والحب اللي وصلني منكم، شكرا لكل شخص أخد من وقته وكتب كلمة حلوة عن مسلسل تحت الوصاية".
وأضافت: "أحب كمان أوجه الشكر لناس كتير جدا بداية من المخرج العظيم محمد شاكر خضير اللي عارف اللي في قلبي تجاهه، وقد إيه هو فنان موهوب وعنده رؤية وحساس جدا، وعلى المستوى الشخصي إنسانيته تفوق أي شيء أنا شوفته قبل كده، أنا بأدين له بكل الفضل على أي حاجة حلوة في المسلسل".
وتابعت: "بشكر المنتج الكبير محمد السعدي وشركة ميديا هب، وخالد وشيرين دياب على الفكرة والموضوع والإبداع اللي مش جديد عليهم، وبيبهرونا في كل عمل جديد بمواضيع مهمة، ومدير التصوير المتميز بيشوي روزفلت اللي قدّم صورة عالمية، وأحمد حافظ المونتير العالمي اللي اتشرفنا بوجوده معانا، والإشراف الفني والديكور للمهندس محمد عطية اللي موهبته طاغية في الوطن العربي كله، والشاطرة مصممة الأزياء ريم العدل، والموسيقى التصويرية للمبدعة ليال وطفة، وبشكر مساعدين الإخراج على تعبهم ومثابرتهم، وقسم الإنتاج وعلى رأسهم المنتج الفني هاني عبدالله وكل رجالته، ومهندس الصوت إسلام عبدالسلام، والـacting coach رامي الجندي، ومساعدتي الشخصية شيماء، وطبعا فريق وكالة جينجر".
واستطردت: "قبل أي حاجة بوجه الشكر طبعا لزمايلي في المسلسل اللي كلهم معجونين موهبة ولولاهم مكنش مسلسل (تحت الوصاية) ظهر بالشكل ده، حقيقي هما كتلة من المواهب المتحركة وعاشقين للفن من أكبر حد فيهم لحد البنوتة الصغيرة اللي فاجئتنا كلنا".
واستكملت "أخيرا مش ممكن أنسى أهالي عزبة البرج وأجدع صيادين في مصر، واللي حسسوني أني بقيت واحدة منهم طول فترة استضافتهم لينا".
واختمت رسالتها: "حقيقي فرحت بتعليقاتكم وتفاعلكم مع المسلسل، وأتمنى إنه يكون نقطة بداية لإعادة النظر في قوانين الوصاية وإعطاء الأمهات الحق في أولادهم، الزمن بيتغير والأوضاع بتتغير والمرأة والأم والزوجة مش عنصر هامشي، دي الأساس اللي قائم عليه كل البيوت، وهي الأصل في حياة أولادها، وكذلك الأب، لذلك نتمنى من المشرّع إعادة النظر في مسألة الوصاية وفي بنود كتير في قانون الأحوال الشخصية عشان نحفظ حقوق الأولاد والآباء والأمهات".