• صباح الخير يافندم

• صباح النور مالك وشك مقلوب ليه. إنت ماشفتش الحشد بتاع امبارح كان يفتح النفس إزاي. ده إحنا هنفشخهم يوم تلاتين. مالك في إيه..إيه اللي شايله في إيدك ده

• لا مافيش يافندم ده تلغراف جالنا بعد المؤتمر

• من مين؟

• من سوريا

• بجد. من مين في سوريا؟

• لا ده من سوريا نفسها

• إزاي يعني؟

• ده اللي حصل سيادتك. إحنا لسه بنحقق في الموضوع بس التلغراف اللي وصل مكتوب عليه إسم المرسل سوريا

• سبحان الله وبتقول لي إيه سوريا في التلغراف؟

• خليك في خيبتك وماتجيبش سيرتي خالص على لسانك. 

•••

• بما إن حضرتك ضيف عزيز علينا في برنامج (ما يطلبه المستمعون) تحب تسمع إيه يوم تلاتين ستة؟

• لازم أختار أغنية برضه؟

• مش شرط.. ممكن تختار حتة من مسرحية.. حتة من فيلم

• ينفع طيب حتة من مكالمة؟

• هي أول مرة أسمعها بس وماله حضرتك تطلب وإحنا ننفذ

• ربنا يخليكي

• هل المكالمة اللي حضرتك عايز تسمعها مشهورة. موجودة يعني على اليوتيوب. اوعى تكون هتطلب مكالمة أحمد التباع وهبة يا خلبوص

• لا دي هتبقى أشهر بكتير بإذن الله.. خصوصا الحتة بتاعة "يا أحمد كلمهم في البيت قولهم يفتحوا التلفزيون بابا الشعب بيخلعه".

•••

بالتأكيد سينتصر الحق على الباطل يوما ما، ليس عندي أدنى شك في ذلك. ذات يوم سينتحر الباطل بعد أن يصاب بنوبة إكتئاب حادة لأنه لم يعد في الحياة جديد ولأن لعبة انتصاره على الحق لم تعد مسلية البتة، عندها فقط سيجد الحق نفسه وقد انتصر لأن خصمه انسحب، وأنصار الحق ستغمرهم الفرحة في البداية ثم عندما يكتشفون الحقيقة ستبوخ فرحتهم وتتحول إلى حزن حقيقي سيجعلهم يبصقون في وجه الحق ويقولون له "إنت بتسمي ده إنتصار يامعفن". والحق سيكتئب اكتئابا عنيفا حادا يشبه اكتئاب ابراهيم يسري في الجزء الثاني من المال والبنون، وسيتمنى الموت مليون مرة فلا يأتيه الموت، وسيفكر الحق مليا في الإنتحار لكن ما سيمنعه كل مرة مخافته أن يقول الناس عنه بعد موته "الله يلعنه عاش مهزوم ومات كافر".

•••

• أتعرفين ما هو الوطن يا صفية؟

• اخلص وقول

• الوطن ألا يحدث ذلك كله، بل يحدث أوسخ من ذلك كله.

• طب يابوز الإخص ربنا يبشر أمك بالخير

•••

مشهد 13 • مكتب إبليس • ليل بهيم • داخلي زنيم

(يمسك ابليس كرباجا ونراه ينهال به على شيطان شاب تم تعليقه على عروسة خشبية موجودة في طرف المكتب إلى جوار تمثال مجسم لناهد شريف. في الغرفة يقف مجموعة من الشياطين من أعمار متفرقة تظهر على وجوههم ملامح الضيق بسبب ما يتعرض له الشيطان الشاب من تعذيب لكن تلك الملامح تختفي ويحل محلها ملامح سعادة مصطنعة فور أن يلتفت ابليس إليهم وهو ينظر لهم شزرا.

الشيطان الشاب: خلاص يابابا حرمت والله مش هاعمل كده تاني

ابليس: هو أنا هاسيبك ياكلب النهارده. لازم أخليك عبرة لكل اخواتك العِرَر اللي ماحدش فيهم علمك اللي أنا علمتهولهم. دورهم جاي دلوقتي

الشياطين (في وقت واحد يتحدثون): واحنا مالنا بس.. احنا نصحناه.. هو اللي استعبط وفرد صدره وحب يجرب.. اسأله كده أنا قلت له ولا لأ

ابليس: بس ولا كلمة.. صحيح الكلام ده يازِبلة جهنم.. انطق

الشيطان الشاب: اللي هو إيه يابابا.. أصل أنا مش قادر افتكر حاجة من الألم

ابليس: اخواتك نصحوك إنك تطبق التعليمات وما تروحش توسوس لأي حد من المشايخ بتوع الفضائيات. انطق. نصحوك ولا لأ؟

(يطرقع الكرباج في الهواء فيرتعب الشيطان الشاب ويصرخ)

الشيطان الشاب: نصحوني نصحوني

ابليس: سمّعني كده قالوا لك إيه؟

الشيطان الشاب: قالوا لي بابا مدي تعليمات ماحدش يضيع وقته ويوسوس لشيوخ.. عشان هيقعدوا يستغفروا ويستعيذوا بالله من الشيطان ويصلوا ويضيعوا الوقت اللي بيقضوه في تخريب عقول الناس واللي احنا نفسنا مابنعرفش نعمله.

ابليس: يا إبن الجزمة طب ماهم قالوا لك أهوه لازم تتشطر بروح أمك. وحياة غروري مانا سايبك النهارده.

(ينهال ابليس عليه جلدا بغضب شديد فيعود الشيطان الشاب للتأوه)

ابليس: قول ورايا ياعرّة الشياطين.. وسوسة لشيوخ لأ.. هما هيخربوا الإنسانية لوحدهم.. ماتعطلهمش عن شغلهم.. قول ياآخرة صبري.. وسوسة لشيوخ لأ

الشيطان الشاب (صارخا من شدة الألم) : خلاص حرمت.. وسوسة لشيوخ لأ.. وسوسة لشيوخ لأ

•••

ليلة السبت شاهدت في المنام مسيلمة الكذاب يتفاوض مع خزنة جهنم لإرسال تلغراف إلى سيدنا أبي بكر الصديق يقول فيه "حاربتوني زمان عشان ارتديت عن الإسلام.. أنا النهارده شفت مظاهرات رابعة العدوية وكنت عايز أقولك إني لو وقفت على دماغي مش هاعرف أضر الإسلام كده".

•••

• ملاك 1: مين الراجل اللي لسه جاي ده؟

• ملاك 2: ده إنسان مات أوسخ موتة في التاريخ

• ملاك 1: هو في أوسخ من الراجل الهندي اللي مات بعد ما الفيل اغتصبه بزلومته؟

• ملاك 2: لا دي ألعن وأضل. الهندي على الأقل مات مغدور. ده غير إن قصته هتتكتب في كتب الغرايب، الرجل الذي ضاجعه الفيل. إنما ده موتته ألعن حتى من موتة الكيني اللي جالنا الأسبوع اللي فات.

• ملاك 1: دوكهه صحي من النوم لقى في تعبان محشور في حلقه. دي موتة خلت جناحي يقشعر لما افتكرتها.

• ملاك 2: ومع ذلك تظل موتة ليها معنى، ما تنساش إن التعبان كان بينتقم عشان الكيني سلخ مراته وعمل من جلدها جراب لموبايله.

• ملاك 1: هو جنسيته إيه؟

• ملاك 2: مصري

• ملاك 1: آه فهمت أكيد شاف رئيس بلده بيخطب

• ملاك 2: لا دي بقت موتة طبيعية جدا هناك

• ملاك 1: ياعم شوقتني جدا، مات إزاي المصري ده

• ملاك 2: ما فيش ياملاك واحد، الراجل ده كان بيخاف على صحته، وعشان المية في بلده ملوثة، فبقى يشرب دايما قزايز مية معدنية، وبعدين قرا في الجرايد إن في شركات بتعبي المية دي من المواسير العادية وبتبيعها فجاله هسس وقرر ما يشتريش إلا النوع اللي يكون مقفول كويس. اشترى نوع جديد البياع قاله إنه متبرشم كويس. جه يفتح القزازة عشان يشرب ما عرفش. حاول بكل ضوافره ما نفعش، ابتدا يتعصب ويشتم، مراته قالت له مش قلنا بلاش الألفاظ القذرة دي قدام العيال بروح أمك. قالها مانا مش هاقعد أفتح في القزازة سنة. قالت له روح المطبخ وحاول تفتحها. راح المطبخ حاول يفتح القزازة بالشوكة ماعرفش بالسكينة العادية بتاعة الأكل ما قدرش قام ماسك سكينة حامية وابتدا يفتح بيها القزازة. كانت الست أم صابر لسه ماسحة المطبخ اتزحلق السكينة رشقت في رقبته، مات وقزازة المية في إيديه متبرشمة.

• ملاك 1: أحيه على دي موتة. أنا ماشفتش ألعن منها لحد دلوقتي. ربنا يتوب علينا من الشغلانة دي اللي تقصر العمر. بعد إذنك أما أروح أمضي قبل ما يرفعوا الساعة.

•••

• المواطن: ألاقي عندكو المضاد الحيوي ده

• الصيدلي (بعد نظرة خاطفة للروشتة يسأل بصرامة): عايز المصري ولا المستورد؟

• المواطن (بعد تردد): يعني مش فارقة.. أي حاجة

• الصيدلي: هو المصري بتلاتين جنيه والمستورد بمية وأربعين جنيه

• المواطن (بفزع): ياااه، ده فرق كبير قوي في السعر، طب إيه الفرق بينهم يعني في التأثير ؟

• الصيدلي: إنت عبيط ولا أهبل، الدوا المصري لو خدته هتتخيط أكتر مانت متخيط ولو غرفت نفسك ممكن تخف أسرع، إنما المستورد هتخف جست لايك ذات، قال إيه الفرق في التأثير، يحرق أم اللي يخلي أشكال زيكو تخش صيدليات (كل هذا لم يقله الصيدلي بفمه بل قالته نظراته بصريح العبارة، أما ما قاله بفمه فكان جملة واحدة: اللي تشوفه حضرتك).

 • المواطن: أيوه مانا عشان كده باسألك إيه الفرق بينهم

• الصيدلي (عادت عيناه لتقول من جديد :"شوف الحمار اللي لسه قايله اللي فيها ولسه بيسأل"، أما فمه فقال: "يعني ده مصري وده مستورد. الفرق واضح". ثم نظر للمواطن نظرة قالت بعلو حسّها "أنا مش هاخاف عليك أكتر من نفسك يابهيم، انت ماسمعتش إن الغالي تمنه فيه، عايز تخيّط نفسك هات الدوا المصري عايز تشتري روحك هات المستورد" وبعد أن أنهت نظرته كلامها، سادت لحظة صمت عاد بعدها فمه ليقول "هه يافندم أجيب لحضرتك إيه؟"

• المواطن: (بعد حشرجة خفيفة) المستورد إن شاء الله

•••

• إنما حضرتك عدمي إيجابي ولا عدمي سلبي؟

• أنا بايو عدمي.

• يعني إيه؟

• يعني ساعات بيبقى مزاجي أكون عدمي إيجابي وساعات بيبقى مزاجي أكون عدمي سلبي.

•••

• ياعزيزي صدقني كلنا مش أكتر من قطع براز صلبة مرمية في ماسورة صرف الكون لغاية ما تحين لحظة شد السيفون النهائية.

• طب لما حضرتك شايف إن كلنا قطع براز، تاعب قلبك ليه وقاعد ترغي وتعارض وتحشد وتقرفنا؟.

• عشان حتى في البراز، في براز خيِّر وبراز شرير، والبراز الخيِّر لازم ينتصر في النهاية.